"मेहरूण तलावातील सांडपाण्याची समस्या त्वरित सोडवा!"

जळगावच्या वैभवाला सांडपाण्याचा विळखा; मेहरूण तलाव प्रदूषणमुक्त करण्यासाठी उपमहापौर व सभापतींचे प्रशासनाला तातडीचे आदेश

जळगाव प्रतिनिधी : जळगाव शहराची ओळख आणि ऐतिहासिक वारसा असलेल्या मेहरूण तलावात वारंवार सांडपाणी मिसळत असल्याच्या गंभीर प्रकाराची अखेर लोकप्रतिनिधींनी दखल घेतली आहे. उपमहापौर मनोज चौधरी, स्थायी समितीचे सभापती डॉ. चंद्रशेखर पाटील, तसेच प्रभाग क्रमांक १३ मधील नगरसेवक नितीन सपके, प्रफुल्ल देवकर, नगरसेविका वैशालीताई पाटील आणि सुरेखा तायडे यांनी संयुक्तपणे तलाव परिसराची पाहणी करून प्रशासनाला तातडीने उपाययोजना करण्याचे निर्देश दिले.

नागरिकांच्या संतापानंतर लोकप्रतिनिधी मैदानात गेल्या काही दिवसांपासून मेहरूण तलावात सांडपाणी मिसळत असल्याच्या तक्रारी सातत्याने समोर येत होत्या. या प्रकारामुळे पर्यावरणप्रेमी, हिंदू सामाजिक संस्थांचे प्रतिनिधी, ज्येष्ठ नागरिक आणि स्थानिक रहिवाशांनी तीव्र नाराजी व्यक्त केली होती. तलावाचे वाढते प्रदूषण आणि दुर्गंधी यामुळे नागरिकांमध्ये अस्वस्थता निर्माण झाली असून प्रशासनाने याकडे तातडीने लक्ष द्यावे, अशी मागणी सातत्याने केली जात होती.

गणेशोत्सव आणि दुर्गोत्सवाच्या पार्श्वभूमीवर वाढलेली चिंता जळगाव शहरातील गणेशोत्सव आणि दुर्गोत्सवात हजारो श्रीगणेश व देवीच्या मूर्तींचे विसर्जन मेहरूण तलावातच केले जाते. अशा परिस्थितीत तलावात सांडपाणी मिसळणे केवळ पर्यावरणासाठीच नव्हे, तर धार्मिक भावना आणि सार्वजनिक आरोग्याच्या दृष्टीनेही गंभीर बाब असल्याचे लोकप्रतिनिधींनी प्रशासनाच्या निदर्शनास आणून दिले.

उत्सवापूर्वी तलाव पूर्णपणे प्रदूषणमुक्त करण्यासाठी ठोस उपाययोजना कराव्यात, अशी मागणी यावेळी करण्यात आली.

शहर अभियंत्यांना तात्काळ काम सुरू करण्याचे आदेश पाहणीदरम्यान उपमहापौर मनोज चौधरी आणि सभापती डॉ. चंद्रशेखर पाटील यांनी शहर अभियंता योगेश बोरोले आणि प्रभाग अभियंता आर. टी. पाटील यांना घटनास्थळीच सांडपाण्याचा स्रोत शोधून तातडीने काम सुरू करण्याचे स्पष्ट निर्देश दिले.

सांडपाणी तलावात जाणार नाही, यासाठी कायमस्वरूपी तांत्रिक उपाययोजना करण्यावर भर देण्याच्या सूचनाही संबंधित अधिकाऱ्यांना देण्यात आल्या.

‘कारवाई झाली नाही तर महासभेत प्रश्न उपस्थित करू’ यावेळी प्रभागातील लोकप्रतिनिधींनी प्रशासनाला स्पष्ट इशारा देत सांगितले की, जर तातडीने उपाययोजना सुरू झाल्या नाहीत, तर हा प्रश्न महानगरपालिकेच्या आगामी महासभेत जोरदारपणे उपस्थित केला जाईल. तसेच प्रशासनाला याबाबत जाब विचारण्यात येईल, असा इशाराही देण्यात आला.

मेहरूण तलावाचे संवर्धन ही काळाची गरज मेहरूण तलाव हा केवळ जलसाठा नसून जळगाव शहराच्या सांस्कृतिक, पर्यावरणीय आणि ऐतिहासिक ओळखीचे प्रतीक आहे. वाढते प्रदूषण रोखण्यासाठी केवळ तात्पुरत्या उपाययोजना नव्हे, तर कायमस्वरूपी सांडपाणी व्यवस्थापन, नियमित देखरेख आणि प्रभावी नियोजन आवश्यक असल्याचे नागरिकांचे मत आहे.

आता प्रशासनाने दिलेल्या निर्देशांची कितपत प्रभावी अंमलबजावणी होते आणि गणेशोत्सवापूर्वी मेहरूण तलाव सांडपाण्यापासून मुक्त होतो का, याकडे संपूर्ण जळगावकरांचे लक्ष लागले आहे.