जनजागृतीच्या रॅलीतच सुरक्षेचा विसर? मनपाच्या बाईक रॅलीत हेल्मेटकडे दुर्लक्ष!

जनजागृतीच्या रॅलीत सुरक्षेचा विसर?

पर्यावरण, आरोग्य अन् सायबर सुरक्षेचा संदेश देताना हेल्मेटकडे मात्र दुर्लक्ष?

जळगाव प्रतिनिधी : महानगरपालिकेच्या वतीने ‘सेवा संकल्प अभियाना’अंतर्गत बुधवारी शहरात बाईक रॅलीचे आयोजन करण्यात आले. सामाजिक बांधिलकी, आरोग्यविषयक जागरूकता, व्यसनमुक्ती, सायबर सुरक्षा आणि पर्यावरण संवर्धनाचा संदेश नागरिकांपर्यंत पोहोचविण्याच्या उद्देशाने काढण्यात आलेली ही रॅली निश्चितच जनजागृतीच्या दृष्टीने सकारात्मक उपक्रम म्हणावा लागेल.

या रॅलीत नागरिकांसह जळगाव महानगरपालिकेचे महापौर दीपमाला काळे तसेच अधिकारी व कर्मचारी मोठ्या संख्येने सहभागी झाले. मुख्य लेखाधिकारी राजू लाकूडझोडे, मुख्य लेखापरीक्षक विजयकुमार सोनवणे, क्रीडा अधिकारी दिनानाथ भामरे यांच्यासह महेंद्र पाटील, संजय ठाकूर आणि विविध विभागांचे अधिकारी-कर्मचारी उपस्थित होते.

मात्र, जनतेला आरोग्य आणि सुरक्षिततेचा संदेश देणाऱ्या या रॅलीत सहभागी काही अधिकारी-कर्मचाऱ्यांकडूनच दुचाकी चालविताना हेल्मेटचा वापर झालेला दिसून न आल्याने सुरक्षेच्या गांभीर्यावर प्रश्नचिन्ह निर्माण झाले आहे.

जनजागृतीचा उपक्रम राबविणे ही निश्चितच कौतुकास्पद बाब आहे. मात्र, ज्या उपक्रमातून नागरिकांना सुरक्षिततेचा संदेश दिला जात आहे, त्या उपक्रमात सहभागी असलेल्या प्रत्येकाने स्वतःच्या सुरक्षेची काळजी घेणे हीदेखील तितकीच महत्त्वाची बाब आहे.

महापालिका प्रशासनाने पर्यावरण संवर्धन, आरोग्य आणि सायबर सुरक्षेसोबतच वाहतूक सुरक्षा आणि हेल्मेट वापराबाबतही आदर्श निर्माण करणे अपेक्षित आहे. कारण जनजागृती केवळ घोषणांमधून नव्हे, तर आपल्या कृतीतूनही होते.

‘सुरक्षिततेचा संदेश देताना स्वतःची सुरक्षितता विसरता कामा नये’ हा या रॅलीतून पुढे आलेला महत्त्वाचा मुद्दा आहे. भविष्यात अशा उपक्रमांचे आयोजन करताना सहभागी अधिकारी-कर्मचाऱ्यांनी वाहतूक नियमांचे काटेकोर पालन करावे, अशी अपेक्षा व्यक्त होत आहे.