जळगाव मनसेकडून महानगरपालिकेत दमदार झेपेची चाहूल
जळगाव – शहरातील आगामी महानगरपालिका निवडणुकीच्या पार्श्वभूमीवर महाराष्ट्र नवनिर्माण सेनेने आपले संघटनात्मक बळ आणि राजकीय रणनीती स्पष्ट करत जनतेमध्ये आपली ताकद दाखवून दिली आहे. मनसेच्या जळगाव शहर तर्फे आयोजित बैठकीत उमेदवार चाचपणीला मिळालेला जबरदस्त प्रतिसाद पाहता, जळगाव मनसे नव्या राजकीय समीकरणांची तयारी करत असल्याचे स्पष्ट दिसून आले.
ही बैठक मा. राजसाहेब ठाकरे यांच्या आदेशानुसार व मनसेचे नेते ॲड. जयप्रकाश बाविस्कर यांच्या मार्गदर्शनाखाली पार पडली. या बैठकीत शहरातील सर्व १९ प्रभागांचा सविस्तर आढावा घेण्यात आला. कार्यकर्त्यांचा उत्साह आणि उमेदवारांची उपस्थिती पाहता, “जळगाव महानगरपालिका निवडणुकीत मनसेचा झेंडा फडकवण्यासाठी जमिनीवर काम सुरू झाले आहे,” अशी भावना बैठकीतून उमटली.
बैठकीत जिल्हाध्यक्ष ॲड. जमील देशपांडे यांनी सांगितले की,
> “जळगाव शहरात महाराष्ट्र नवनिर्माण सेनेबद्दल जनतेचा विश्वास वाढत आहे. अन्य पक्षातील अनेक कार्यकर्ते आणि संभाव्य उमेदवार मनसेच्या संपर्कात आहेत. जनतेच्या प्रश्नांवर आंदोलन, निवेदन आणि प्रत्यक्ष रस्त्यावर उतरून लढा देणारा एकमेव पक्ष म्हणजे महाराष्ट्र नवनिर्माण सेना आहे.”
ते पुढे म्हणाले,
> “महानगरपालिका निवडणुकीत मनसे सर्व १९ वार्डांमध्ये उमेदवार देणार आहे. जनतेच्या पाठिंब्याने ही निवडणूक आम्ही पूर्ण ताकदीने लढवू आणि शहराच्या विकासाचा नवा आराखडा राबवू.”
महानगराध्यक्ष विनोद शिंदे यांनी वार्ड रचना आणि मतदारयादीतील तांत्रिक बाबींचा सविस्तर आढावा घेतला, तर महानगराध्यक्ष किरण तळले यांनी निवडणूक रणनीती, जनसंपर्क आराखडा आणि प्रचार मोहीमेबाबत मार्गदर्शन केले. त्यांनी सांगितले की, “राजसाहेब ठाकरे यांच्या नेतृत्वाखाली महाराष्ट्र नवनिर्माण सेना ही फक्त आंदोलन करणारी नव्हे, तर पर्यायी सत्तेचा गंभीर पर्याय ठरत आहे.”
बैठकीस उपमहानगराध्यक्ष श्रीकृष्ण मेंगडे, राजेंद्र निकम, चेतन पवार, प्रकाश जोशी, शेतकरी सेनेचे जिल्हा संघटक अविनाश पाटील, वाहतूक सेनेचे रज्जाक सय्यद, राहुल चव्हाण, दीपक राठोड, पवन सपकाळे, ऐश्वर्या श्रीरामे, भूषण ठाकूर, ॲड. सागर शिंपी, खुशाल ठाकूर, तसेच महिला सेनेच्या अनिता कापुरे, लक्ष्मी भील, अनिता बोरसे, ज्योती खुरपुडे, शुभांगी कावळे, लता पाथरवट यांच्यासह शेकडो महाराष्ट्र सैनिक उपस्थित होते.
या बैठकीदरम्यान महानगरपालिका निवडणुकीसाठी इच्छुक उमेदवारांची प्राथमिक चाचपणी करण्यात आली. अनेक नवोदित, तरुण आणि महिला उमेदवारांनी मनसेच्या बॅनरखाली निवडणूक लढवण्याची तयारी दर्शवली. कार्यकर्त्यांचा जोश आणि शिस्तबद्ध आयोजन पाहता, मनसे जळगावच्या राजकारणात नव्या ऊर्जेने उभी राहत असल्याचे स्पष्ट संकेत मिळत आहेत.
राजकीय जाणकारांचे मत आहे की, गेल्या काही महिन्यांत मनसेने शहरातील विविध लोकहिताच्या मुद्द्यांवर आंदोलन करून जनतेत आपली उपस्थिती प्रभावीपणे दर्शवली आहे. त्यामुळे जळगाव महानगरपालिका निवडणुकीत मनसेचा जनाधार वाढत असून, पारंपरिक राजकीय समीकरणांना या वेळी नव्या रंगात आव्हान मिळू शकते.
बैठकीच्या शेवटी एकच घोष पुन्हा पुन्हा घुमत होता —
“राजसाहेबांच्या नेतृत्वात, मनसेची झेप महानगरपालिकेत!” “जनतेचा प्रश्न – मनसेचा लढा!”
About the Author
