कामगारांच्या प्रश्नांना न्याय देण्यासाठी अर्जुन पवार यांच्यावर नवी जबाबदारी...

लोकमान्य श्रमिक कामगार संघटनेच्या जळगाव जिल्हाध्यक्षपदी नियुक्ती…

जळगाव प्रतिनिधी : सामाजिक आणि कामगार क्षेत्रात सातत्याने केलेल्या कार्याची दखल घेत अर्जुन पवार यांची लोकमान्य श्रमिक कामगार संघटना, उत्तर महाराष्ट्र – जळगाव जिल्हाध्यक्षपदी नियुक्ती करण्यात आली आहे. कामगार, वंचित आणि दुर्बल घटकांच्या प्रश्नांना प्रभावीपणे वाचा फोडण्याची जबाबदारी आता त्यांच्या खांद्यावर सोपविण्यात आली आहे.

लोकमान्य श्रमिक कामगार संघटनेच्या ध्येय-धोरणांना बांधील राहून कामगारांच्या विविध समस्या व प्रश्न सोडविण्यासाठी प्रयत्न करणे, तसेच अन्यायग्रस्त कामगारांना न्याय मिळवून देण्यासाठी संघटितपणे आवाज उठविणे, ही प्रमुख जबाबदारी अर्जुन पवार यांच्यावर राहणार आहे. कामगारांच्या हक्कांशी संबंधित प्रश्न प्रशासन आणि संबंधित यंत्रणांसमोर प्रभावीपणे मांडण्याची अपेक्षाही संघटनेने व्यक्त केली आहे.

कामगार हा समाजव्यवस्थेचा महत्त्वाचा आधारस्तंभ असला, तरी वेतन, रोजगारातील असुरक्षितता, कामाच्या ठिकाणी होणारे प्रश्न, शासकीय योजनांचा लाभ आणि सामाजिक सुरक्षेपासून वंचित राहणारे घटक यांसारखे अनेक प्रश्न आजही कायम आहेत. या प्रश्नांना संघटित व्यासपीठ उपलब्ध करून देण्याच्या दृष्टीने अर्जुन पवार यांच्यावर सोपविण्यात आलेली जिल्हाध्यक्षपदाची जबाबदारी महत्त्वाची ठरणार आहे.

दरम्यान, अर्जुन पवार यांना लोकमान्य श्रमिक कामगार संघटनेचे नियुक्तीपत्र प्रमुख उपस्थित रवींद्र महाजन यांच्या हस्ते प्रदान करण्यात आले. यावेळी उपस्थित मान्यवरांनी पवार यांच्या नियुक्तीचे स्वागत करून त्यांच्या पुढील सामाजिक आणि कामगार क्षेत्रातील वाटचालीस शुभेच्छा दिल्या.

माजी मंत्री गुलाबराव देवकर यांचे समर्थक म्हणून ओळखले जाणारे अर्जुन पवार यांच्यावर आता कामगार संघटनेच्या जिल्हाध्यक्षपदाची नवी जबाबदारी सोपविण्यात आली आहे. त्यामुळे सामाजिक क्षेत्रातील त्यांच्या कार्यासोबतच कामगारांच्या प्रश्नांवर ते कोणती भूमिका घेतात आणि जिल्ह्यात संघटनेचे काम कशा पद्धतीने विस्तारतात, याकडे लक्ष लागले आहे.

जळगाव जिल्ह्यात संघटनेचा विस्तार करून कामगार आणि वंचित घटकांपर्यंत संघटनेचे कार्य पोहोचविण्याचे आव्हानही पवार यांच्यासमोर असणार आहे. त्यांची नियुक्ती तीन वर्षांच्या कालावधीसाठी करण्यात आली असून, त्यानंतर त्यांच्या कार्याचा आढावा घेऊन पुढील कार्यकाळाबाबत निर्णय घेतला जाणार आहे.

अर्जुन पवार यांच्या नियुक्तीमुळे जळगाव जिल्ह्यात कामगारांच्या प्रश्नांना संघटितपणे मांडण्यासाठी नवे व्यासपीठ निर्माण होण्याची अपेक्षा व्यक्त होत आहे. त्यांच्या सामाजिक व कामगार क्षेत्रातील पुढील वाटचालीस विविध स्तरांतून शुभेच्छा दिल्या जात आहेत.