जनता लाईव्ह :– जळगावमध्ये ब्लू बर्ड बिझनेस आणि सोशल ऑर्गनायझेशनतर्फे आयोजित करण्यात आलेला भव्य बिझनेस मीट आणि मोफत डिजिटल ॲपचे चॅप्टर लॉन्चिंग हा केवळ कार्यक्रम नव्हता, तर जिल्ह्यातील उद्योजकांना डिजिटल आणि संघटीत व्यावसायिक पायाभूत सुविधा मिळवून देणारा परिवर्तनशील उपक्रम ठरला आहे. जिल्ह्यातील उद्योगपती, व्यावसायिक आणि नवउद्योजकांच्या उत्स्फूर्त प्रतिसादाने हा कार्यक्रम विशेष ठरला.
कार्यक्रमाची सुरुवात भगवान गौतम बुद्ध आणि भारतरत्न डॉ. बाबासाहेब आंबेडकर यांच्या प्रतिमेस पुष्पहार अर्पण करून आणि सामूहिक त्रिशरण-पंचशील ग्रहण करून झाली, ज्यामुळे कार्यक्रमाला मूल्याधिष्ठित आणि सन्माननीय प्रारंभ मिळाला. त्यानंतर दीपप्रज्वलन करून उद्घाटन सोहळा पार पडला. या वेळी मंचावर ब्लू बर्डचे संस्थापक आणि राष्ट्रीय अध्यक्ष ॲड. रंजीत फुले, महाराष्ट्राचे समन्वयक ॲड. त्रिरत्न बागूल, उद्योगपती संजय इंगळे, ॲड.राजेश झाल्टे आणि ॲड. सागर बहिरूणे यांची प्रमुख उपस्थिती होती. त्यांच्या उपस्थितीमुळे कार्यक्रमाला संघटनात्मक भक्कम दिशा आणि दृष्टी प्राप्त झाली.
पहिल्या सत्रात उपस्थित उद्योजकांचा परिचय, त्यांचे व्यवसाय, उद्दिष्टे आणि सध्याच्या आव्हानांवर मुक्त संवाद झाला. शासनाच्या विविध सहाय्य व कर्जयोजना, व्यवसायासाठी भांडवल उभारणीचे उपाय, प्रशिक्षण आणि मार्गदर्शनाच्या संधी तसेच अनुभवी उद्योजकांनी तरुण उद्योजकांना आधार देण्याची गरज यावर सखोल चर्चा करण्यात आली. येथे “उद्योजकतेचे यश हे कल्पनाशक्ती, योग्य मार्गदर्शन आणि नेटवर्किंग यांवर आधारित असते” हा संदेश ठळकपणे समोर आला.
दुसऱ्या सत्रात ब्लू बर्डचे अधिकृत ऑनलाइन मोफत डिजिटल ॲपचे जळगाव चॅप्टर मान्यवरांच्या हस्ते लॉन्च करण्यात आले. या ॲपच्या माध्यमातून व्यवसायांचे मोफत डिजिटल नोंदणी, जाहिरात, नेटवर्किंग, ग्राहकांपर्यंत थेट पोहोच आणि एकाच प्लॅटफॉर्मवर जिल्ह्यातील सर्व व्यावसायिकांना जोडण्याची सुविधा उपलब्ध होणार आहे. विशेष म्हणजे कार्यक्रमात उपस्थित व्यावसायिकांनी त्वरित ॲप डाउनलोड करून आपले व्यवसाय रजिस्टर केले, ज्यातून उद्योजकांचा डिजिटल स्वीकार स्पष्ट दिसला.
कार्यक्रमाच्या शेवटी जळगाव जिल्ह्याची नवीन कार्यकारिणी जाहीर करण्यात आली. जिल्हाध्यक्षपदी ॲड. सागर बहिरूणे यांची नियुक्ती झाली असून इतर पदांसाठी जिल्हा, तालुका आणि विविध विभागांसाठी जबाबदाऱ्या निश्चित करण्यात आल्या. ही रचना भविष्यातील संघटनात्मक कामकाजासाठी निर्णायक ठरणार आहे.
कार्यक्रमाचे प्रभावी सूत्रसंचालन प्रकाश सरदार, ॲड. सुनील इंगळे, ॲड. कमलाकर शिरसाट, ॲड. अभिजीत लोखंडे, युवराज सोनवणे आणि सहकाऱ्यांनी केले. कार्यक्रमाचा समारोप सरंथा आणि आभार प्रदर्शनाने करण्यात आला.
या उपक्रमातून जळगाव जिल्ह्यातील उद्योजक आता एकत्र येऊन व्यवसाय संधी, नेटवर्किंग, डिजिटल पायाभूत सुविधा आणि परस्पर सहयोगाच्या माध्यमातून नव्या औद्योगिक युगात प्रवेश करत असल्याचे चित्र दिसते. ब्लू बर्डचे हे पाऊल जिल्ह्याच्या औद्योगिक आणि व्यावसायिक प्रगतीचा महत्त्वाचा टप्पा ठरेल, यात शंका नाही.
About the Author
