उद्धव-राज ठाकरे २० वर्षांनी एकाच व्यासपीठावर!वरळी डोमवर ५ जुलै रोजी ‘विजयी मेळावा’; मराठी जनतेला मोठं आवाहन
मुंबई प्रतिनिधी | राजकारणात दोन दशके दूर राहिलेल्या ठाकरे बंधूंमध्ये आता ऐतिहासिक पुनर्मिलन घडत आहे. महाराष्ट्र नवनिर्माण सेनेचे अध्यक्ष राज ठाकरे आणि शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे हे दोघेही तब्बल २० वर्षांनंतर प्रथमच एकत्र एका व्यासपीठावर येत आहेत. निमित्त आहे — ५ जुलै रोजी सकाळी १० वाजता वरळी डोम येथे होणारा ‘विजयी मेळावा’.
या मेळाव्याची घोषणा मनसेच्या अधिकृत ट्विटर अकाऊंटवरून करण्यात आली असून, राज व उद्धव ठाकरे यांच्या संयुक्त पत्रकाद्वारे मराठी जनतेला या कार्यक्रमात वाजतगाजत सहभागी होण्याचे जाहीर आवाहन करण्यात आले आहे. त्यामुळे राज्यातील राजकीय वर्तुळात, विशेषतः मराठी जनांमध्ये मोठी उत्सुकता निर्माण झाली आहे.
२००५ मध्ये फुट, २०२५ मध्ये एकत्र
सन २००५ मध्ये राज ठाकरे यांनी शिवसेना सोडून मनसेची स्थापना केली होती. त्यानंतर राज आणि उद्धव यांच्यात राजकीय संवाद संपुष्टात आला होता. परंतु आता, मराठी अस्मिता, भाषा, आणि संस्कृतीच्या मुद्द्यावर हे दोघं पुन्हा एकत्र आलेले पाहायला मिळणार आहेत.
पत्रकात ‘राज’ यांचं नाव आधी
या ऐतिहासिक पत्रकात राज ठाकरे यांचे नाव उद्धव ठाकरेंच्या आधी आहे, याकडे अनेकांचे लक्ष वेधले जात आहे. पत्रकात म्हटले आहे :
> “आवाज मराठीचा! मराठी मातांनो, भगिनींनो आणि बांधवांनो, सरकारला नमवलं का? तर हो, नमवलं! कुणी नमवलं? तर ते तुम्ही – मराठी जनतेनं! आम्ही फक्त तुमच्या वतीने संघर्ष करत होतो. आजचा दिवस हा विजयाचा आहे. आम्ही फक्त आयोजक आहोत, जल्लोष तुम्ही करायचा आहे. वाजतगाजत या, गुलाल उधळत या, आम्ही वाट बघतोय!”
राजकीय आणि सांस्कृतिकदृष्ट्या महत्त्वपूर्ण क्षण
हा मेळावा केवळ एक राजकीय कार्यक्रम न राहता, मराठी अस्मितेच्या नवचैतन्याचा निर्धार करणारा क्षण ठरू शकतो. उद्धव ठाकरे आणि राज ठाकरे एकत्र येणं म्हणजेच मराठी मतदाराला दिलेला नवा संदेश मानला जात आहे.
मेळाव्याचे आयोजन आणि तयारी
५ जुलैच्या मेळाव्यासाठी मनसे व शिवसेना (उबाठा गट) यांनी संयुक्त तयारी सुरू केली आहे. विविध मराठी संघटना, युवक मंडळं, व सांस्कृतिक गट मोठ्या संख्येने सहभागी होण्याची शक्यता आहे. गुलाल, ढोल-ताशे, लेझीम यांसारख्या पारंपरिक उत्साहात मेळाव्याला सुरुवात होणार आहे.
विशेष लक्षात ठेवा :
ही एक ऐतिहासिक संधी आहे — मराठी माणसाचा एकोपा, आत्मसन्मान आणि भविष्य घडवण्याची. ठाकरे बंधूंना एकत्र पाहण्याची उत्सुकता आणि उत्साह शिगेला पोहोचलेला आहे.
About the Author
