खडसेंच्या मुक्ताई बंगल्यातील चोरी की राजकीय संदेश? - 'सीडी-प्रकरणा'चा धागा पुन्हा जिवंत..

“खडसेंच्या बंगल्यातील चोरी की राजकीय स्फोटाची नांदी?”

जळगाव | संपादकीय विश्लेषण 28 ऑक्टोबरची सकाळ जळगावसाठी नेहमीसारखी नव्हती. कारण या सकाळी शहरातील राजकीय तापमान अचानक वाढले होते. कारण होते ज्येष्ठ नेते आणि आमदार एकनाथ खडसे यांच्या मुक्ताई बंगल्यातील चोरी. शिवराम नगरातील या बंगल्यातील चोरी फक्त मौल्यवान वस्तूं पर्यंत मर्यादित नसून, तिच्या पलीकडे एक वेगळं गूढ दडलेलं असल्याचे संकेत आता मिळत आहेत.

खडसेंच्या मुक्ताई बंगल्यातील या चोरीची बातमी समोर येताच पोलीस तपास यंत्रणा हलली. प्राथमिक तपासात उघड झाले की, चोरट्यांनी केवळ सोन्या-चांदीच्या वस्तूं वरच डल्ला मारलेला नाही, तर महत्त्वाची कागदपत्रे सीडी आणि पेन ड्राईव्ह देखील गायब झाल्या आहेत. ही बाबच या घटनेला एक नवीन वळण देते.

खडसे बाहेरगावी असताना ही घटना घडली. ते परत आल्यानंतर त्यांनी स्वतः घटनास्थळी पाहणी केली आणि पत्रकार परिषद घेतली. त्यावेळी त्यांनी केलेले विधान हे केवळ चोरीपुरते मर्यादित नव्हते. खडसेंनी सांगितले की माझ्या घरातून मौल्यवान वस्तू तर गेल्याच आहेत, पण काही महत्त्वाची कागदपत्रे सीडी आणि पेन ड्राईव्ह सुद्धा चोरीला गेल्या आहेत या कागदपत्रांमध्ये काही मोठ्या गैरव्यवहारांशी संबंधित माहिती होती.

हे विधान होताच राजकीय वर्तुळात कुजबुज सुरू झाली. कारण खडसेंनी कुठल्याही व्यक्तीचं नाव न घेता महत्त्वाची प्रकरणे आणि काही नेत्यांशी संबंधित कागदपत्रे असा उल्लेख केला. म्हणजेच त्यांनी सूचक पण तीव्र बाण सोडला कोणावर हे त्यांनी सांगितलं नाही पण त्या बाणाचा टोक राजकारणाच्या आतल्या पातळीवर कुठे लागतोय, याची चर्चा मात्र तात्काळ सुरू झाली.

“सीडी” शब्द पुन्हा एकदा चर्चेत एकनाथ खडसेंच्या राजकीय प्रवासाकडे पाहिलं तर सीडी हा शब्द त्यांच्यासोबत वारंवार जोडला गेला आहे.

2016 मध्ये भाजप सरकारच्या काळात मंत्रीपदाच्या काळात ते अडचणीत आले, भोसरी प्रकरणानंतर त्यांनी राजीनामा दिला आणि पक्षात मतभेद निर्माण झाले. त्यानंतर 2020 मध्ये त्यांनी राष्ट्रवादी काँग्रेसमध्ये प्रवेश केला. त्या प्रवेशावेळी त्यांनी केलेलं विधान आज पुन्हा आठवलं जातं “जर मला ईडी लावली, तर मी सीडी लावेन.”

या एका वाक्याने त्या काळी महाराष्ट्राचं राजकारण हादरलं होतं. त्यावेळी सर्वत्र प्रश्न विचारला जात होता खडसेंकडे नेमक्या कोणत्या सीड्या आहेत त्या सीडीमध्ये काय आहे कोणत्या नेत्यांशी त्या संबंधित आहेत?

त्यावेळी त्यांनी त्या विषयावर फार काही उघड बोललं नाही, पण त्यांनी दिलेले संकेत पुरेसे होते. नंतर हनी ट्रॅप प्रकरणातील उद्योजक प्रफुल लोढा याच्याशी त्यांचं नाव जोडलं गेलं आणि पुन्हा “सीडी प्रकरण” चर्चेत आलं. त्या वेळी खडसेंनी सांगितलं होतं की माझ्याकडे कोणत्याही प्रकारच्या सीडी नव्हत्या त्या प्रफुल लोढाकडे होत्या.

पण आज ज्या वेळेस त्यांच्या बंगल्यातून “सीडी आणि पेन ड्राईव्ह” चोरीला गेल्याचं ते सांगत आहेत, तेव्हा पुन्हा तोच प्रश्न समोर येतो त्या कोणत्या सीडी होत्या? आणि त्यामध्ये नेमकं काय होतं?

राजकीय पार्श्वभूमी आणि “सूड पुराण” जळगाव जिल्ह्याच्या राजकारणात खडसेंचं स्थान वेगळं आहे. ते केवळ आमदार नाहीत तर जळगावच्या राजकीय समीकरणांतील एक किंगमेकर व्यक्तिमत्त्व आहेत.

गिरीश महाजन यांच्याशी असलेला त्यांचा दीर्घकाळचा संघर्ष, भाजप पासूनचा त्यांचा वेगळा प्रवास आणि राष्ट्रवादी काँग्रेसमधील भूमिका या सगळ्या मुळेच ते सतत चर्चेत राहिले आहेत.

2016 ते 2019 या काळात त्यांनी तत्कालीन मुख्यमंत्री देवेंद्र फडणवीस आणि गिरीश महाजन यांच्यावर तीव्र टीका केली. 2019 मध्ये त्यांच्या कन्या रोहिणी खडसे यांचा पराभव झाल्यानंतर त्यांनी राजकीय समीकरण बदललं. 2020 मध्ये राष्ट्रवादी काँग्रेसमध्ये प्रवेश केला आणि महाविकास आघाडी च्या सत्तेत त्यांना संधी मिळेल अशी चर्चा होती. पण तेव्हाच सत्तांतर झालं आणि महायुती सरकार आलं.

या सर्व प्रवासात खडसेंनी नेहमीच एक गोष्ट कायम ठेवली ते बोलतात तेव्हा थेट बाण सोडतात पण नाव घेत नाहीत. त्यामुळे प्रत्येक विधानानंतर खडसे कोणाकडे निर्देश करत आहेत? हा प्रश्न उभा राहतो.

खडसेंच्या बंगल्यातील चोरीबाबत अजूनही अनेक प्रश्न अनुत्तरित आहेत. पोलिस तपास सांगतो की घरातील केअरटेकरच्या कुटुंबातील काही वस्तूही चोरीला गेल्या आहेत. पण खडसेंनी पत्रकार परिषदेत स्पष्ट केलं की ज्या रूममध्ये महत्त्वाची कागदपत्रं होती, त्या रूममधील वस्तूच चोरीला गेल्या आहेत.

मग हा योगायोग म्हणायचा का नियोजनबद्ध डाव?

खडसेंचा हा दावा पोलिसांसाठी मोठं आव्हान ठरला आहे. कारण जर चोरीचा उद्देश फक्त सोन्या-चांदीचा नसेल, तर महत्त्वाची कागदपत्रं आणि डेटा चोरी करण्यामागे नेमकं कोणाचं स्वार्थ आहे, याचा तपास करणे पोलिसांसाठी तितकंच कठीण ठरणार आहे.

राज्याच्या कायदा-सुव्यवस्थेवर प्रश्नचिन्ह खडसे हे याआधीही पोलिस तपासाच्या कार्यक्षमतेवर प्रश्नचिन्ह उपस्थित करत आले आहेत. त्यांच्या जावयावर झालेल्या पुण्यातील रेव्ह पार्टी प्रकरणातही त्यांनी पोलिसांच्या भूमिकेवर नाराजी व्यक्त केली होती. आता पुन्हा ते म्हणत आहेत की महत्त्वाची कागदपत्रं चोरीला गेली, आणि पोलिसांनी याचा उलगडा करावा.

हे वक्तव्य केवळ त्यांच्या घरापुरतं मर्यादित नाही तर राज्याच्या कायदा-सुव्यवस्थेवरील विश्वासालाही आव्हान देणारं आहे. पुढचा राजकीय अर्थ राजकारणात काही गोष्टी उघडपणे बोलल्या जात नाहीत त्या घडवून दाखवल्या जातात.

खडसेंच्या बंगल्यातील चोरी ही अशाच एखाद्या घडवून आणलेल्या घटनेचा भाग असू शकते का हा प्रश्न आता राजकीय विश्लेषक विचारत आहेत. एकीकडे राज्यात सत्ता-समीकरणं बदलत आहेत तर दुसरीकडे जुने नेते पुन्हा आपलं राजकीय अस्तित्व मजबूत करण्याचा प्रयत्न करत आहेत.

त्यात अशा घटनांमुळे चर्चेचा फोकस बदलतो आणि त्या चर्चेत पुन्हा एकदा सीडी कागदपत्रं आणि गैरव्यवहार हे शब्द मध्यवर्ती होतात.

निष्कर्ष एकनाथ खडसे यांची राजकीय ओळख नेहमीच दोन टोकांमध्ये अडकलेली दिसते सत्ता आणि बंड. त्यांचं प्रत्येक वक्तव्य हे एखादं नवीन प्रकरण उघड करणारं ठरतं. आता त्यांच्या बंगल्यातील चोरीने पुन्हा एकदा सीडी प्रकरणआणि सूडपुराण या दोन गोष्टींना जीवदान दिलं आहे.

पोलिस तपासाने या चोरीचा उलगडा करावा हे नक्की. पण त्या तपासाच्या पलीकडेही एक मोठं चित्र आहे ते म्हणजे महाराष्ट्राच्या राजकारणातील संवेदनशील फाईल्स आणि साठवलेला डेटा यांचा नवा खेळ.

खडसे पुन्हा चर्चेत आले आहेत, पण या वेळेस कारण “सत्तेचा संघर्ष” नाही तर त्यांच्या घरातून गायब झालेली कागदपत्रं, सीडी आणि पेन ड्राईव्ह आहेत. आता हा तपास पोलिस उलगडतात की राजकारण उलगडतं हे येणारे काही दिवस ठरवतील.