जळगाव स्मशानभूमींमध्ये आता सीसीटीव्ही कॅमेरे...

“मृत्यूलाही सुरक्षा लागतेय!” — जळगाव स्मशानभूमींमध्ये आता सीसीटीव्ही कॅमेरे

जळगाव प्रतिनिधी | न्यूज नेटवर्क

मृतांच्या अस्थीसुद्धा सुरक्षित नाहीत, हा वास्तववादी आणि धक्कादायक प्रकार जळगाव शहरात उघड झाला आहे. मेहरुण स्मशानभूमीत अस्थी चोरीचा प्रकार उघडकीस आल्यानंतर नागरिकांमध्ये संताप पसरला होता. या घटनांमुळे जागे झालेल्या जळगाव महानगरपालिकेने अखेर कारवाईला वेग देत शहरातील प्रमुख स्मशानभूमींना सीसीटीव्ही नजरेखाली आणण्याचा निर्णय घेतला आहे.

शिवाजीनगर व नेरी नाका स्मशानभूमीत तातडीने सीसीटीव्ही बसवले

मेहरुण घटनेनंतर पालिकेने नेरी नाका आणि छत्रपती शिवाजी महाराज नगर (शिवाजीनगर) स्मशानभूमींमध्ये सीसीटीव्ही कॅमेरे आणि पथदिवे बसवून सुरक्षा वाढवली आहे. दोन शिफ्टमध्ये सुरक्षा रक्षकांची नियुक्तीही करण्यात आली आहे.

सहाय्यक आयुक्त उदय पाटील यांनी सांगितले की, मनपाच्या भांडार विभागाकडे कॅमेरे बसवण्याची जबाबदारी सोपवण्यात आली आहे, तर आरोग्य विभागाच्या माध्यमातून २४ तास सेवा देणारे सुरक्षारक्षक नेमले जातील.

मेहरुण आणि पिंप्राळा स्मशानभूमी पुढील टप्प्यात

मनपा प्रशासनाने सांगितले की, पुढील दोन दिवसांत मेहरुण आणि पिंप्राळा स्मशानभूमींमध्येही सीसीटीव्ही कॅमेरे बसवले जाणार आहेत. या ठिकाणी रात्रीचा अंधार कायमस्वरूपी दूर करण्यासाठी पथदिव्यांची व्यवस्था आणि सततच्या सुरक्षा शिफ्ट्स सुरू केल्या जातील.