“सत्तेच्या उंच इमारतीतून दिसत नाही का जळगावचा जमिनीवरील वास्तव?”
जळगाव जिल्हा आज राजकीय दृष्ट्या अत्यंत मजबूत स्थितीत आहे. दोन केंद्रीय मंत्री, दोन राज्यमंत्री आणि केंद्रासह राज्यातही याच पक्षाची सत्ता — पण तरीसुद्धा जळगाव शहरातील नागरिक आजही मूलभूत हक्कांसाठी तडफडत आहेत, हे किती मोठं विडंबन!
आशिया खंडातील सर्वाधिक उंच इमारत अशी ओळख असलेल्या जळगाव महानगरपालिकाची प्रतिमा मात्र जमिनीवर कोसळल्यासारखी दिसते. मृत्यूनंतरही नागरिकांना शांतता नाही — इतकंच नव्हे तर शहरातील स्मशानभूमीतून मृतांच्या अस्थी चोरीला जाण्याचे प्रकार घडत आहेत. आठवडाभरात दोन ठिकाणी झालेल्या या अमानुष घटनांनी संपूर्ण शहर हादरले आहे. हे केवळ प्रशासनाचे नव्हे, तर आपल्या शहराच्या नैतिक मूल्यांचं अपयश आहे.
महानगरपालिकेच्या निष्क्रियतेला आमदार राजू मामा भोळे यांनी योग्य शब्दांत ओळख दिली — “प्रत्येक ठिकाणी पैसा नाही असं म्हणून चालणार नाही!” स्थानिक प्रश्न सोडवण्यासाठी विधानसभेत आवाज उठवावा लागतो, हेच प्रशासनाच्या अपयशाचं जिवंत उदाहरण आहे.
मंत्री, आमदार, खासदार आणि आयुक्त — सगळ्यांच्या खुर्च्या मात्र स्थिर आहेत, पण शहरातील मूलभूत समस्या मात्र ढवळून निघत नाहीत. नालेसफाई, पाणीपुरवठा, रस्ते, आणि आता मृतांच्या अस्थींचं संरक्षण — या सर्वच बाबतीत जळगाव शहर प्रशासनाचा भोंगळ कारभार झाल्याचं स्पष्ट दिसतं.
प्रशासनाने हे लक्षात घेतलं पाहिजे की नागरिकांचा संयम हा मर्यादित असतो. सत्तेच्या उंच इमारतीत बसून जमिनीवरील दुर्गंधी दिसत नाही, पण ती नागरिकांना दररोज भोगावी लागते.
आता तरी जागे व्हा, अन्यथा जळगाव शहराला “उंच इमारत, पण खालचा दर्जा” अशी उपहासात्मक ओळख मिळायला वेळ लागणार नाही.
About the Author
